കുറുനരി മാലാഖ വേഷം കെട്ടിയ കഥ

ഞാനൊരു സുന്ദരനെന്നൊരു പുഞ്ചിരി
ചുണ്ടിൽ ചൂടി നടക്കും സ്റ്റീഫൻ
കാക്കേപ്പോലും കണ്ണിൽ ക്കണ്ടാൽ
കണ്ണിറുക്കിക്കാണിക്കും

വെട്ടുംകിളി യെന്നും പേരിൽ
വെട്ടും കുത്തും കളിയായ് ചെയ്യും
സ്റ്റീഫൻ ചെറിയൊരു ഗുണ്ടാത്തലവൻ
സ്റ്റീഫൻ നമ്മുടെ ഗ്രാമത്തലവൻ

ജാതിയെ വിട്ടില്ലൊരു കളിയതിനാൽ
ജാതിക്കാരുടെ കൂട്ടുണ്ട്
സ്റ്റീഫൻ സ്റ്റീഫൻ മന്ത്രം ചൊല്ലി
ശിഷ്യൻ മാരുടെ നിരയുണ്ട്

കാലം പോകെ കൊല്ലും കൊലയും
അണികളെയേല്പിച്ചൊരുനാൾ സ്റ്റീഫൻ
നാടിന് നന്മക്കായ്ത്തൻ ജന്മം
നൽകിയതായി പ്രതിജ്‌ഞ ചെയ്തു

നാടിൻ നായകനാകാനാദ്യം
ബ്യുട്ടി പാർലർ തറവാടാക്കി
വെട്ടിൻ പാടും ചോരക്കറയും
കഴുകിക്കഴുകി വെടിപ്പാക്കി

ഞാനൊരു സുന്ദരനെന്നൊരു പുഞ്ചിരി
ചുണ്ടിൽ കൂടുതൽ വിരിയിച്ചു
കാക്കേപ്പോലും മുന്നിൽ കണ്ടാൽ
സാത്വികഭാവം കാണിച്ചു

എങ്കിലുമുള്ളിലെ ജാതിസ്‌നേഹം
കുത്തിക്കുത്തി ക്കേറുമ്പോൾ
അറിയാതുള്ളിൽ നിന്നൊരു കുറുനരി
ഓരിയിടാനെഴുനേൽക്കുന്നു ........!

തിരക്ക്

മുറ്റത്തുണ്ടൊരു നെല്ലിമരം
അരികത്തായൊരു മുല്ലച്ചെടിയും
ചില്ലക്കൈകളിൽ വള്ളികൾ ചുറ്റി
പ്രണയിക്കുന്നുണ്ടെപ്പോഴും

പ്രണയത്തിന്റെ തിരക്കാലാണോ
പൂക്കുന്നില്ലവർ രണ്ടാളും

നിങ്ങളുടെ വെളുവെളുത്ത പാട്ടുകള്‍

എനിക്കെന്‍റെ ബാല്യം
തിരികെ വേണ്ട
നിങ്ങള്‍ പാടുന്നപോലൊന്നുമല്ല
നിങ്ങളുടെ പാട്ടിലേതൊന്നുമില്ല

കുതികൊള്ളാന്‍ ചവിട്ടവേ
കുതറിമാറിയും
ഇളവേല്‍ക്കാനണയവേ
മുള്‍മുനയുയര്‍ത്തിയും
കഠിനകാലമേ
മുടിഞ്ഞ ബാല്യമേ
കരിന്തിരി തെളിച്ചനിന്‍
കരിഞ്ഞ കാഴ്ചകളെനിക്കിനി വേണ്ട
എനിക്കെന്‍റെ ബാല്യം
തിരികെ വേണ്ട
വെളുവെളുത്ത പാട്ടുകള്‍ പാടി
ബാല്യത്തിലേക്ക്
ഊഞ്ഞാലാടുക
നിങ്ങള്‍

പാസ് വേഡ്

എന്‍റെ ശവപ്പെട്ടിയടപ്പിന്‍റെ
ഉള്ളിലായെന്തിനു
നീയെഴുതി വച്ചൂ,

നിന്‍റെ
ഹൃദയ വാതിലിന്‍
പാസ്സ് വേഡു ....പ്രിയേ...?

ഓണത്തിലേക്കുള്ള
ഓട്ടമാണോണം,
ഓണമൊരോട്ടക്കലവും.....

നോട്ടങ്ങള്‍

നിരീക്ഷിച്ച് നിരീക്ഷിച്ച്
നിഗമനത്തിലെത്തുന്ന
കഴുകന്‍മാരെയും
കാണുന്നുണ്ട്
മറ്റുചില
കണ്ണുകള്‍

അതിലേതാണ്,
എവിടെയാണ്,
നിന്നെയളക്കുന്ന
എന്നെയളക്കുന്ന
എന്‍റെ
നിന്‍റെ
കണ്ണുകള്‍.....?