എന്‍റെ കവിത

കനക തൂലികയല്ല
ലെക്സിപ്പെന്നാണ്

പാല്‍ക്കഞ്ഞിയില്ല
പൊറോട്ടയാണ്

ദീര്‍ഘദര്‍ശനം തെല്ല്
കുറഞ്ഞു പോയിട്ടുണ്ടാം

കോണും മുഴകളും
തീര്‍ക്കാനേ ഭാവമില്ല

പ്രാണനാണെനിക്കവ
വേണെങ്കിലെടുത്തോളൂ....

അര്‍ബുദം പോ-
ലക്രമം പോല്‍
വെറുപ്പിനുണ്ടാം
വളര്‍ച്ചക്കു വേഗം......!

ന ല്ലതു നഗരം തന്നെ
-------------------------------------
ന ല്ലതു നഗരം തന്നെ
തോന്നിയ പോലെ നടക്കാം
ചിന്താകുലനാണെന്നതുപോലെ
ചെമ്മേനീലാകാശം നോക്കി
ചുമ്മാതങ്ങു നടക്കാം

അങ്ങനെയല്ലേലന്തര്‍മുഖനായ്
തോന്നിപ്പിക്കും പോലൊരുഭാവം
പുറമേ വാരിപ്പൂശിക്കൊണ്ട്
മിണ്ടാതങ്ങു നടക്കാം

വേണേല്‍
നെഞ്ചുവിരിച്ചൂച്ചാളിപ്പീസില്‍
മൂടുകള്‍ മുലകള്‍ നോക്കിനടക്കാം

അയ്യടമനമേയീപ്പോകുന്നത്
തെക്കേടത്തിലെ ഡാഷല്ലേ
കുഞ്ഞുവറീതിന്‍ മോനല്ലേ
പഞ്ഞക്കാലം പോയപ്പോള്‍
നെഞ്ചു ഞെളിഞ്ഞതു കണ്ടില്ലേ

എന്നൊരു പട്ടീം പറയില്ല
എന്നൊരു നോക്കും നോക്കില്ല

ന ല്ലതു നഗരം തന്നെ.........

ശലഭം
----------------
ഞാനറിയാതെ
എന്നെയിങ്ങനെ
നോക്കിയിരിക്കാന്‍
എന്‍തു രസമാണ്

നാളെയാ ചിറകുകള്‍
നിറം മങ്ങുമെന്നും
അകലങ്ങളോര്‍ത്തു
കുഴഞ്ഞുപോമെന്നും

ഓര്‍ക്കയേയില്ല ഞാനപ്പോള്‍....!