പൊതുവിജ്ഞാനം

എന്ത് പഠിച്ചു ?
ഡിക്രി
താല്പര്യങ്ങൾ?
ഓ
വായന ?
ങേ
പത്രമെങ്കിലും ?
ആ....
രാഷ്ട്രീയത്തെപ്പറ്റി
ഒറ്റയെണ്ണം ശരിയല്ല
അതെന്താ അങ്ങനെ ?
ആ...... എനിക്കറിയില്ല
ആരാ ഭരണകക്ഷി
ആ...... എനിക്കറിയില്ല, ഓപ്ഷൻ തന്നാപ്പറയാം
തരാം എ ബി സി ഡി
ഏ യല്ലേ ?
അല്ല
ബീയല്ലേ ?
അല്ല
സീയല്ലേ ?
അല്ല
ഡി തന്നെ എനിക്കറിയാം ഉറപ്പുണ്ട്
അച്ഛനെന്താ ജോലി
ആ...... എനിക്കറിയില്ല,ഏതോ കമ്പനിയിലോ മറ്റോ ആണ്
ഓപ്ഷൻവേണോ
വേണ്ട
അച്ഛന്റെ പേര്
എ ബി സി ഡി -ശ്ശെ അല്ല രാജന് ന്നാ

ഒരോണപ്പാട്ടുകൂടി 

.......................................
വീണ്ടും വന്നൂ പൂവിളികൾ 
പൂവുകളില്ലാ പൂവിളികൾ 
പൂമണമോലാ പൂക്കളങ്ങൾ 
ബാലത്വമില്ലാത്ത ബാല്യങ്ങൾ 

യന്ത്രങ്ങളായി ജനിച്ചിടുന്നു 
യന്ത്രങ്ങളായി വളർന്നിടുന്നു 
യന്ത്രത്തറികളിൽ നെയ്തെടുത്തോ - 
രെന്ത്രസ്വപ്നങ്ങളിൽ പാറിടുന്നു

എങ്കിലും പങ്കിലുമൊന്നുമില്ല
പങ്കെനിക്കൊന്നു നീ തന്നാൽ മതി
എങ്കിലേ മംഗലം വന്നുകൂടൂ
അല്ലേലും പങ്കിടലല്ലേയോണം ,................!

അയോദ്ധ്യ -രണ്ടുകവിതകൾ (2005)
......................................................................
1
രാമന്‍
..................
മൈഥിലീപ്രണയ നഷ്ടത്തില്‍
ഏകനാ-
യിരുളിലാ-
യുള്ളുരുക്കിയ
കമനീയവിഗ്രഹന്‍
രാമന-
ല്ലിന്നു രാമന്‍

ചെറിയൊരുകൈത്തെറ്റിനാ-
ലുടഞ്ഞുചിതറുന്ന ,
കാലില്‍
തറഞ്ഞു കയറുന്ന ,
രാമനാ
ണിന്നു രാമന്‍

2
മോര്‍ച്ചറി
..........................
ഒരു തീപ്പൊരി മാത്രം
കാത്തു കിടപ്പൂ
നമ്മള്‍

തമ്മില്‍ വളര്‍ത്തിയ
സര്‍പ്പമൊരെണ്ണം
നീണ്ടു നിവര്‍ന്നു
നമുക്കിടയില്‍

ഒരു
തീക്കളി മാത്രം
ബാക്കി കിടപ്പൂ
മുന്നില്‍