ഓണത്തിലേക്കുള്ള
ഓട്ടമാണോണം,
ഓണമൊരോട്ടക്കലവും.....

നോട്ടങ്ങള്‍

നിരീക്ഷിച്ച് നിരീക്ഷിച്ച്
നിഗമനത്തിലെത്തുന്ന
കഴുകന്‍മാരെയും
കാണുന്നുണ്ട്
മറ്റുചില
കണ്ണുകള്‍

അതിലേതാണ്,
എവിടെയാണ്,
നിന്നെയളക്കുന്ന
എന്നെയളക്കുന്ന
എന്‍റെ
നിന്‍റെ
കണ്ണുകള്‍.....?

കുഴി വെട്ടീടാന്‍ വരുമോ നീ

അരികിലിരിക്കുന്നൊരു
ജാതിവാല്‍ത്തീട്ടം
കടന്നുപോകുന്നൊരു
ജാതിക്കണ്‍ തീട്ടം
പിറുപിറുക്കുന്നൊരു
ജാതിച്ചൊല്‍ത്തീട്ടം
നേര്‍ക്കുനേര്‍ വരുന്നയ്യോ
സംഘടിതത്തീട്ടം

തീട്ടക്കൂമ്പാരത്തി,ന്നരികെ
ക്കൂടി,നടന്നു മടുത്തവരേ
വരുമോ നിങ്ങള്‍ കുഴി വെട്ടാന്‍
വലിയൊരു കുഴിയിനി വേണ്ടി വരും

പാസ് വേഡ്

എന്‍റെ ശവപ്പെട്ടിയടപ്പിന്‍റെ
ഉള്ളിലായെന്തിനു
നീയെഴുതി വച്ചൂ,
നിന്‍റെ
ഹൃദയ വാതിലിന്‍
പാസ്സ് വേഡു ....പ്രിയേ...?

വഴികൾ പിരിഞ്ഞു പോയത്

സൗഹൃദം മൂപ്പെത്തിയ
നാളുകളിലൊന്നിൽ
കൈപിടിച്ചവളെന്നെ
കൊണ്ടുപോയൊഴിഞ്ഞൊരാ
കോണിലെ വാകച്ചോട്ടിൽ

വർഷാവസാന
ബഹളമൊഴിഞ്ഞതിൻ
മൂകതനിറഞ്ഞിട്ടു
മെന്തുവർണാഭമാ
ണിവിടം മനോഹരം
തൊട്ടതില്ലിന്നേവരെ
വിരലിൻ തുമ്പിൽ പോലു
മേറെയായ് സുഹൃത്‌കാല
മതിനാലാണോ മൃദു
സ്പർശവും തിളയ്ക്കുന്നു
എന്നുമെന്നതുപോലെ
ചിരിച്ചു ,ചിരിയാലെല്ലാം
മറച്ചു മായ്ക്കാനുള്ളോ
രെൻശ്രമമാദ്യം തന്നെ
തടഞ്ഞു ചോദിച്ചവൾ
നിനക്കു ഞാനെന്താണ്
നീയാരാണെനിക്കെന്നും
ഇനിയെനിക്കാവില്ലൊട്ടു
മിങ്ങനെ തുടരുവാൻ
ഞാനൊരു വിളറിയ
ചിരിയിലൊളിക്കുന്നു
പറയാനാവാത്തതാ
മില്ലായ്മ പെരുംകടൽ
ചിരിയാം പരിചക്കു
നേരിടാനാകാത്തൊരു
നേരമെത്തിയ നേരം
പറഞ്ഞു ഞാനൊപ്പിച്ചു
നീയെനിക്കന്നുമെന്നും
പറയാതെല്ലാമെല്ലാ
മറിയും സുഹൃത്തല്ലോ
ഇനിയുമെന്നത്തേക്കു
മിങ്ങനെ തുടരേണം
നനഞ്ഞ കണ്ണാലവൾ
വിടർന്നു നോക്കും നോട്ടം
നേരിടാനാവാതെ ഞാൻ
മരമെണ്ണവേ കൈകൾ
കവരുന്നവൾ വീണ്ടും
നീയെന്നും നടിക്കുന്നു
വാക്കിലും നോക്കിൽ പോലും
പിരിയാം നമുക്കിനി
നിഴലായ് ഞാനില്ല നിൻ
വഴിയിൽ നിന്നോടൊപ്പം
ഞാനൊരു വിഡ്ഢിച്ചിരി
മാത്രമായ് നടക്കുന്നു
വാകപ്പൂ ചുവപ്പിന്റെ
കമ്പളം വിരിക്കുന്നു.....!

സന്ദേശ കാവ്യം

മുകിലുപോയിട്ടൊ
രെലിയുമില്ലല്ലോ
നിനക്കുസന്ദേശം
കുറിച്ചയക്കുവാന്‍

വിരഹിയിന്നു ഞാ
നെരിതീയില്‍ വീണ
കുരുവിയെന്ന പോല്‍
പിടഞ്ഞൊടുങ്ങുന്നു

തകര്‍ന്നടിഞ്ഞതാം
നിനവിന്‍ കൊട്ടാര
പ്പൊടിപ്പുകയിരുള്‍
പരത്തിനില്‍ക്കുന്നു.

ഇലയില്ലാമര
ത്തണലുമില്ലല്ലോ
ഇളവേല്ക്കാനെനി
ക്കൊരിറ്റുനേരവും

വെറുപ്പുമാത്രമാ
ണെനിക്കു രാക്കൂട്ട്
മൃതിതന്‍ താളമാ
ണെനിക്കു താരാട്ട്

അതിനാലിന്നുഞാ
നടച്ചു വയ്ക്കുന്നു
പ്രിയതമേ നിൻറെ
പ്രണയ പുസ്തകം 

പുച്ഛപുരാണം

നേര്‍ക്കുനേരറിയുന്നു
നന്നായിച്ചിരിക്കിലും
നിന്നുള്ളിലോളംവെട്ടും
പുച്ഛത്തെഞാനെപ്പൊഴും
എങ്കിലുംചിരിക്കുംഞാ
നെന്നുള്ളിലെനിക്കെന്നോ
ടുള്ളതിനംശംമാത്രം
നിന്നിളം പുച്ഛം തുച്ഛം....